تبلیغات
آذربایجان ادبیاتی - ممد آراز شعرلر məmməd araz şerlər
ممد آراز شعرلر məmməd araz şerlər |

عؤمور کئچیر، یامان کئچیر، 

  قلبیمدن قارا قان کئچیر. 

  داها گؤزللر یان کئچیر، 

  آغارما، ساچیم، آغارما!

  آغارما، ساچیم، آغارما! 

  نه ائرکن سنه دن دوشدو، 

  نییه دوشدو، ندن دوشدو؟ 

  بئینیممی قوووه دن دوشدو؟ 

  آغارما، ساچیم، آغارما! 

 

  آرزو سونسوز، عؤمور یاری... 

  آرتدی آلنین قیریشلاری، 

  سنده اینصاف اولسون باری 

  آغارما، ساچیم، آغارما! 

 

  منی قمگین گؤرسه اگر 

  دوشمن گولر، دوست قم یئیر، 

  قیزلار باخیب  " دایی "  دئیر، 

  آغارما، ساچیم، آغارما! 

 

  داشدیر قلبین، داشدیر جانین، 

  یوخدور، دویغون، یوخدور قانین. 

  هله گنجم، سن ویجدانین 

  آغارما، ساچیم، آغارما! 

 

  عؤمور کئچیر، یامان کئچیر، 

  قلبیمدن قارا قان کئچیر. 

  داها گؤزللر یان کئچیر، 

  آغارما، ساچیم، آغارما!

 

  هله سسیم اوجالماییب، 

  ائل گوجوندن گوج آلماییب. 

  هله اورک قوجالماییب 

  آغارما، ساچیم، آغارما! 

 

  ایلهام آدلی شاهپریم وار، 

  یول اوستیم، سفریم وار... 

  یازیلمامیش اثریم وار... 

  آغارما، ساچیم، آغارما... 

 

  سحر- سحر 

  باهارین نه گؤزل چاغلاری گلمیش، 

  بولبولو چاغیریر گول سحر- سحر. 

  وطنین عشقییله دیل آچیب یئنه 

  کؤنلومون سازیندا تئل سحر- سحر. 

 

  چیخیر مئشه لیکدن تالایا الیک، 

  سکیر داشدان داشا خینالی ککلیک. 

  شئه دن مونجوق دوزور گوللوک، چیچکلیک، 

  گلینه بنزه ییر چؤل سحر- سحر.

 

  گئدیرم تله سیک تارلایا ساری، 

  هامیدان تئز گله او قیز دا باری. 

  سینه سی قارتاللی قایالیقلاری 

  عکس ائدیر سونالی گؤل سحر- سحر.

 

  سئودا یولچوسونون خیالینا باخ، 

  سنسیز افسانه دیر گؤزللیک آنجاق. 

  ائی گونش اوزلو یار، گونشدن قاباق 

  یولوما نور چیله، گَل سحر- سحر. 

 

شعره گتیر 

  شاعیر دوستوم، چالدیغین ساز 

  ائلدن آیری سس اوجالتماز، 

  گل حیاتین نفه سینی 

  حیاتدا دوی، حیاتدا یاز. 

  گور چایلاری سسینه قات، 

  نه شؤهرت گز، نه ده کی، آد. 

  گل زحمت چک، زحمتده کی  

  شان- شؤهرتی شعره گتیر! 

  طبیعتین اؤز شعری وار، 

  طبیعتی شعره گتیر. 

 

  دره نی کئچ، دوزده دایان، 

  جئیران کئچن ایزده دایان، 

  آخشام اوستو قیزلار گلیر، 

  دوش بولاغین اوسته دایان. 

  سئودیییندن ایلهام آلیر. 

  چوبان دؤشده توتک چالیر، 

  او توتکده دیله گلن 

  صداقتی شعره گتیر. 

  محبتین اؤز شعری وار، 

  محبتی شعره گتیر... 

 

  دیرمان داغا، ائن آرانا، 

  آش مورووو، کئچ موغانا. 

  قار سینه سی، گونش اوزو 

  گونش آلتدا یانا- یانا 

  پامبیق درن بیر گؤزلین 

  اللرینی سیخسین الین. 

  او گؤزلین حوسنونده کی  

  عظمتی شعره گتیر، 

  قلبینده کی  چیرپینتینی، 

  حرارتی شعره گتیر. 

 

  قانادینی شیمشکدن آل، 

  ایلهامینی اورکدن آل! 

  گول- چیچیین عطرینی گل 

  چیچکلنن امکدن آل. 

  باخ ائللرین قودرتینه، 

  چات ائللرین قودرتینه، 

  چات زامانین سورعتینه. 

  قلم گؤتور سورعت ایله، 

  بو سورعتی شعره گتیر. 

  یازیلمامیش، دویولمامیش 

  شعریتی شعره گتیر. 

 

  گل باهارین خوش چاغیندا 

  باهار گزمه اوتاغیندا. 

  یاز باهارین شعرینی ده 

  طبیعتین قوجاغیندا. 

  سؤز اوستونده شام کیمی یان، 

  آسان گلن گئدیر آسان. 

  من دئمیرم یالنیز گؤزل 

  بیر خیلقتی شعره گتیر، 

  شاعیر دوستوم، گل حیاتی، 

  حقیقتی شعیره گتیر. 

  1957 

 

الوعدا، داغلار! 

  بلکه بو یئرلره بیر ده گلمدیم، 

  دومان، سالامات قال، داغ، سالامات قال. 

  دالیمجا سو سپیر یوخسا بولودلار؟ – 

  لئیسان، سالامات قال، یاغ، سالامات قال! 

 

  قیی ووران قارتاللار یوخ اولدو چنده، 

  نرگیزلر سارالدی شئهلی چمنده. 

  ائی قاراگؤز پری، دالیمجا سن ده 

  بویلان، سالامات قال، باخ، سالامات قال!

 

  گلدیم، قارشیلادی گوللر- چیچکلر، 

  گئدیرم، ال ائدیر بوز بیچنکلر. 

  نیدامی چایلارا دئدی کولکلر: 

  بولان، سالامات قال، آخ - سالامات قال! 

 

  داغلارین پلنگی، شیری ده سنسن، 

  شاعیری ده سنسن، شعیری ده سنسن. 

  واری، برکتی، خئیری ده سنسن – 

  چوبان، سالامات قال، ساغ-سالامات قال! 

  1962 

 


نوشته شده توسط سخاوت عزتی در جمعه 9 مرداد 1388 و ساعت 08:02 ب.ظ
نوشته های پیشین
+ şəki iylə görüş+ سخاوت عزتی+ elşən əzim+ elşən əzim qifil şeri ائلشن عظیمین قیفیل شعری+ kəlbəcər balasi elməddin nicat+ کلبجربالاسی علم الدین نیجات kəlbəcər balasi elməddin nicat+ bir eşqin sonu+ səxavət ezzəti+ dil nədir+ elşən əzimin şeirləri ائلشن عظیمین شعرلری toplayan səxavət izzəti+ səxavat izzəti سخاوت عزتی+ səxavət izzəti qoşma سخاوت عزتی قوشما+ son görüş yazani səxavət ezzəti سون گؤروش یازانی سخاوت عزتی+ səməd vurğun صمد وورغون Azərbaycan+ səxavət izzəti şerlər سخاوت عزتی شعرلر

صفحات: