تبلیغات
آذربایجان ادبیاتی - شریفه جعفری
شریفه جعفری | عمومی ,

قوربانام آدینا آذربایجانین

یورغون اولادینا آذربایجانین

ائل چاتسین دادینا آذربایجانین

                      اولدوزلار ایچینده دان اولدوزویام

                      افتخاریم بو دور آذر قیزییام

شریفه جعفری

 

بیوگرافی ( اؤز دیلیندن )

شریفه جعفری 1356 دا میانادا دونیایا گؤز آچیب و ایله همان شهریده ابتدایی، راهنمایی و متوسطه نی اوخویوب باشا یئتیرمیشم . 17 یاشیمدان شعیر یازماقا  باشلامیشام . بیر عاییله ده دونیایا گؤز آچمیشام كی هم آتام و هم آنام ذوق اهلی ،و عاشیق  شعرلرین و ناغیللاری بیلیب و همیشه بیزه اوخویوب دییردیلر ، آتام اؤزونه یانی اؤز اوره یینه گؤره هر زامان دویغولانیب و هیجان لاناندا شعیر دییر . و آنام بوتون آذربایجان حماسه لرین ، اوسطوره لرین و ناغیللارین  سینه سینه ییغیب و ازبرله میشدی. آتام بیر كشاورزیدیر  بیزلری باغدا ، بوستاندا اؤز باشینا ییغیب ایشله ده – ایشله ده اصلی كرمدن – عاشیق غریبدن – طاهیر میرزه دن و ... اوخویوب و دییه دییه اونلارین   حماسه یارادان شخصییتلرینین  آدین دیینده بیزین آدلاریمیزی یئرینه قویوب و بیزده بو حیس لری قووه لندیرردی . من اؤزومو  همیشه نیگار ، اصلی ، شاه صنم یا گولگز بیلردیم . نتیجه ده 17 یاشیما چاتاندا گؤردوم بیر درین یانقینلیق منی  ایچریده یاندیریر . و هئچ بیر زادیلان دا بو اود سونمه ییر . آنجاق اؤزومه گلینجك آنلادیم ایله رسما غزل قالیبینده شعیر یازیرام  ایله همان یازدیقیم ایلده مقام اولی میانانین  دانش آموزلارینین ایچینده ، مقام استانی و شعرلریم محلی و  دانش آموزی نشرییه لرینده چاپ اولوردو . انجمن لرین توسطیلن استانی همایش لره دعوت اولونوب و مقام كسب ایله دیم . سونرا زنگان دانیشگاهینا چیخماقینان  اورایا گئدیب درس اوخوماقا باشلادیم . دانشگاهدا چوخ چكمه دیر دانشگاه شاعیره سی نین لقبین  آلیب و بوتون برنامه لرده و نشریه لرده شعرلریمی یاییردیم داها ، سراسری نشریه لر ده ده شعیر لریم یاییلیردی .

1379  زنگانین  رادیو تلویزیونوندا ، یازیچی وادیتور كیمی ایشه باشلادیم و چوخ زامان چكمه دی  اوردا  بیر ادبی یاشیل یارپاق آدلی كی فقط توركو یازیچی و شاعیرلرین تانیتدیرماسیدی دوزلده نی اولدوم . سونرا بیر گیلانلی  شاعیریلن ائوله نیب و ائله زنگاندا یاشاماقا باشلادیم . كی ایندیسه حیاط یولداشیمین اوچ اثری یاییلیبدیر و اولریده ابهرین آزاد دانیشگاهیندا درس وئریللر .

آدلاری سیامك سلیمانی روشن دیر  توركو دیلین  زنگانا درس اوخوماغا گلندن سونرا اویرنمه گه باشلاییب و ایندیسه كامیل بو زنگین دیلی  دانشیب و باشا دوشورلر . حیدربابانی  گیلكی یه منظوم صورتده كوچوروب و چاپا یئتیریبلر. 

   اؤزومده ایكی شعر مجموعه سی توركی دیلیجه چاپا یئتیریب یایمیشام (من آتامین قیزییام) (گیزلین محبتیم) آدلی. كیتابلاردیلار .

 ایكی دنه ده ترجمه ایشله میشم بیری ناخجووان شاعیری حسین باقیر اوغلونون  (من چیینیمدن یئره قویدوم دونیانی و بیریده توركیه نین شاعیری احمد عاریفین سئودان بنی ) سیدیر.

  پینار اینتشاراتینین  یولا سالماسیلان و ائله اوردا توركو كیتابلارین یایماسیلا اؤز آنا دیلیمه اولان   بورجو مو وئرمك ایسته ییرم.

قیناق : ://tarla-roshan.blogfa.com

آذر قئزی

ائلیمین اوبامین سازینا بندم

ظولمه باش اَیمی‌‌ین قیزینا بندم

گؤرمه‌لی قیشینا یازینابندم

                  اولدوزلار ایچینده دان اولدوزویام

                    افتخاریم بو دور آذر قیزییام

 

بینامی قویوبدور عشقیله آنام

اؤیره‌دیب ائلی‌مین دردینه یانام

اؤلكه‌می عزّتیم شرفیم سانام

              اولدوزلارایچینده دان اولدوزویام

                    فتخاریم بو دور آذر قیزییام

 

كؤكومو قازمالار، قورودا بیلمز

اؤزگه‌لر دیلیمی اونودا  بیلمز

سؤزو دوشونمی ین ، بونودا بیلمز

                اولدوزلار ایچینده دان اولدوزویام

          افتخاریم بودور آذرقیزییام

 

قوربانام آدینا آذربایجانین

یورغون اولادینا آذربایجانین

ائل چاتسین دادینا آذربایجانین

                      اولدوزلار ایچینده دان اولدوزویام

                      افتخاریم بو دور آذر قیزییام

 

دینجل سین

قوی اؤپوم گؤزلرووی بلكه اورك دینجل سین

سن ده بیركلمه دانیش منده دیلك دینجل سین.

قوزا یئردن باشوو سال قولومون اوستونده

قؤل دؤلاشسین بؤیونا یانقی بیلك دینجل سین.

باشووا دؤنمه ده یورقون دگیلم آمما آخی

اؤت قالا بیردفعه وورقون كپه نك دینجل سین.

پیشمیشم گون آلوویلا دؤداغیم قوپ قورودو

سنده  بیر دامجی دامیز ساخسی سه نك دینجل سین.

بایرام

قلم چال، دفتر اوینا، بیز باریشدیق باده كئفلندی
منیّت سوسدو ،بیرلیق بیر درین معناده كئفلندی !
گول آچدی كؤنلومون دیلسیز دیاری لاله‌زار اولدو
محبّت ماهنا آخداردیقجا مین معناده كئفلندی
قیامت قوپدو گؤردوم كؤنلومون دیل سیز دیاریندا
كوكوندن وار یوخوم آشكار دؤنوب فریاده كئفلندی
حال اهلین حال اوتاندیردی، گؤرنده گؤز باخیشلارین
كؤزردی عشق اؤزو بیر گؤرمه لی سیماده كئفلندی
ملك‌لر اندی گؤیدن دادماغا لذت دادین یئرده
دئدم بایرام بودور به‌به كی استغناده كئفلندی !!
سازین سیزلاندیر آی عاشیق دینه یالوارماسین موسی،
كرمدن جلوه‌لندی یار اؤزو سیناده كئفلندی
«دنیز» تصویره چكدیغجا گؤروش دونیاسی‌نین شوكرون
بالیخلار چیپچالاندی شوق دان دریاده كئفلندی

 

بؤیوك عالیم حكیم هیدجی‌نین خاطرلاماسینا

معرفت زیروه سی‌نین قارتالی تاردان دانیشیر
كئفلی پیمانه‌لرین باده‌سی یاردان دانیشیر
ائل ایچینده بئجه ریب گؤیلره ال چاتدیرماق
مومكین ایمیش كی حكیم ایللره واردان دانیشیر
بابامین تاریخ اوجا اؤلكه‌ده یانسین اوجاغی
اؤ گونشدن باج آلیب نور كیمی ناردان دانیشر
چاشیب اولدوزلارین عاقلی گئجه‌لر صبحه كیمی
بو درین كلمه‌لری، سؤزلری هاردان دانیشیر
آنا یوردو ایله تورك اهلینه وارلیقدی بوتون
نئجه‌كی هیدجی هر یئرده دیاردان دانیشیر
كؤچولوب قئش اوباسی یوخدو قیرولاردا كسر
یاشیل احساسلی بولوتلاردا باهاردان دانیشیر
.

 

مست اولدو دیوان تیتره دی

ازدیلرپهلوی عشقی دؤزمه دی جان تیتره دی
فاطمه تاآخ دئدی دین اسدی ایمان تیتره دی.
معجرین آلدی اله داده چاغیرسین آللهی
ال گؤیه قوزانمامیش مسجیدده اركان تیتره دی.
رنگی سولموش گوللرین نن ال چكنده فاطمه
یئل گیجه لندی نوایه گلدی طوفان تیتره دی.
زینبین نیسگیل لرین ییغمیشدی یاره قلبینه
یاره لی گئتدی قالیب زینب هراسان تیتره دی
گئتدی مولا تیكیه گاهی یئر گؤیو ماتم توتوب
مظلوم اؤلدو فاطمه تاریخده عصیان تیتره دی.
هر سازین بیر سوزی وار هر عاشیقین بیر معشوقی
سسله دیم یا فاطمه مست اولدو دیوان تیتره دی.


نوشته شده توسط سخاوت عزتی در چهارشنبه 8 اسفند 1386 و ساعت 10:02 ق.ظ
نوشته های پیشین
+ şəki iylə görüş+ سخاوت عزتی+ elşən əzim+ elşən əzim qifil şeri ائلشن عظیمین قیفیل شعری+ kəlbəcər balasi elməddin nicat+ کلبجربالاسی علم الدین نیجات kəlbəcər balasi elməddin nicat+ bir eşqin sonu+ səxavət ezzəti+ dil nədir+ elşən əzimin şeirləri ائلشن عظیمین شعرلری toplayan səxavət izzəti+ səxavat izzəti سخاوت عزتی+ səxavət izzəti qoşma سخاوت عزتی قوشما+ son görüş yazani səxavət ezzəti سون گؤروش یازانی سخاوت عزتی+ səməd vurğun صمد وورغون Azərbaycan+ səxavət izzəti şerlər سخاوت عزتی شعرلر

صفحات: