تبلیغات
آذربایجان ادبیاتی - کاظیم آغا سالیک
کاظیم آغا سالیک | عمومی ,

مجلیسلر زیوری گؤردویون سالیک،

خاقانی، انوری گؤردویون سالیک،

 شاعیرلر سروری گؤردویون سالیک،

 گل گؤر سنسیز نئجه گئدالانیبدیر.

 19اینجی یوزایلین شاعیرلریندن اولوب، 1781 ایلینده قازاخ بؤلگه سی نین شیخلی کندینده دونیایا گلمیشدیر. کازیم آغا سالیک، تورکجه دن باشقا، فارسجانی دا موکممل بیلیرمیش. اونون حاققیندا محرحوم فیریدون یک کؤچرلی  آراشتیرما یاپمیشدیر.و یازدیغی یازیلارین بیر یئرینده بئله بیر قئید وار: « موللا پناه واقیفدن سونرا مرحوم کاظیم آغا سالیک نه اینکی واحید قازاخ ماحالیندا، بلکه تامامی زاقافقازییادا ظوهور ائدن شعرانین موقتدیرلریندن بیریسی حساب اولونور. بو آناجان میلتیمیز ایچینده اونون شؤهرت و حؤرمت کسب ائتمه دیگینه عومده سبب آثاری نین مورتتب بیر قایدا اوزره طبع و نشر اولمادیغیدیر. بو کم اعتینالیق و قدیربیلمه مزلیک تک بیر سالیکی-مرحومون حاقیندا اولماییب، چوخ شعرا و اودبامیزین حالینا شامیلدیر.»

 سالیک، خالق ادبییاتی نین قوشما و گرایلی کیمی تورلرینده اؤنملی شعرلر سؤیلمیشدیر. دیوان طرزینده ده(غزل ، موخممس ، ترکیب بند ) کیمی شعرلری اولان سالیک، علی شیر نواینین تاثیری آلتیندا قالمیشدیر. آذربایجان شعرینده  " مستزاد و ردالصدر علی العجز (1) قوشما "  آدلی شعر تورونو ادبییاتا گئتیرمیش و بو تورون ایلک اؤرنکلرینی وئرمیشدیر. سالیکین شعرلرینده؛ حایاتا باغلیلیق، اینسانلاری و حایاتی سئومه باشدا گئدیر. کاظیم آغا سالیک، 1842 ایلینده، دوغولدوغو و حایاتی نین تامامینی گئچیردیغی شیخلی کندینده وفات ائتمیشدیر.

آرتیق بیلگی اوچون باخابیلرسینیز :

1- فیریدون بک کؤچرلی آذربایجان ادبیاتی تاریخی . 2 -  حسین افندی غایبوف آذربایجاندا مشهور اولان شعرانین اشعارینا مجموعه ایکی اینجی جلد . 3 -  اون دوققوز اینجی عصر آذربایجان ادبیاتی فیض اله قاسیمزاده . 4 – اون دوققوز اینجی عصر ادبیاتی منتخباتی . 5 – دکتر جواد هئیت آذربایجان ادبیاتینا بیر باخیش بیر اینجی جلد

آذربایجانین غئرتلی اوغلو و قدرتلی شاعیری موصطفا آغا عارفین سیبرییه ده سورگون اولونان ایللرینده سالیکین اونا یازدیغی شعرلریندن بیری :

          سنسیز

دردیم کی اولور زیاده سنسیز ،

جانیم اوزولور مباده سنسیز ،

شاها گله گؤر کی فرض کؤنلوم ،

چنگینده اولوب پیاده سنسیز ،

جانیم چیخار اولدو حسرتیندن ،

عؤمروم گئدر اولدو باده سنسیز ،

ساقی یئته گؤر کی بزم غمده ،

قان اولدو قدح ده باده سنسیز ،

چکمیش هوسین شکسته سالک ،

نه قومه باخار ، نه یاده سنسیز ،

  عارف موصطفا آغانین سالیکه یازدیغی جاوابی :

جان زارو تنیم نزار سنسیز ،

عؤمروم باشا یئتدی یار سنسیز ،

فریاد کی دؤورنامورووت ،

قویدو منی ائی نیگار سنسیز ،

دل غونچه سی قان اولوب آچیلماز ،

یوز مین گر اولا بهار سنسیز ،

رنگیم گولو زعفرانه دؤندو ،

دل غمدن اولوب فیکار سنسیز ،

یوخ منده قرار و تاب وطاقت ،

تاب ائتمک اولورمو یار سنسیز ،

ای گول گئجه گوندوز عارف آغلار ،

بولبول کیمی زار – زار سنسیز ،

           جیغالانیبدیر  

  ائی شاهین جیلولیم، شونقار شیولیم،

 دورنا تک تئللرین جیغالانیبدیر

 خسته کؤنلوم اونو گؤرندن بری،

 چیخیب آسیمانه ، هاوالانیبدیر.  

 

 ائی لبلری نابات، دهانی پوسته،

 چکر حسرتینی بو دیلی خسته،

 خال دئییل گؤرونن آغ سینن اوسته،

 بیر قرآن حرفیدیر، قارالانیبدیر.  

 

دئمه کی، سئودیییم سنه نیهاندیر،

 سنه عاشیقلیغیم خلقه عیاندیر،

 دئییبسن: بوسه مین قییمتی قاندیر،

 آلماق اوچون بیرآز باهالانیبدیر.  

 

چوخ دا مندن کنار گزمه آی پری،

 سنسن کؤنلوم ذؤوقو، دیلیم ازبری،

 گوشه- یی کویینی بولاندان بری،

 دردی بیدرمانیم دوالانیبدیر.  

 

مجلیسلر زیوری گؤردویون سالیک،

خاقانی، انوری گؤردویون سالیک،

 شاعیرلر سروری گؤردویون سالیک،

 گل گؤر سنسیز نئجه گئدالانیبدیر.

              دؤنوبدور

 ائی پریزاد، ندیر یئنه قاشلارین،

 اییلیب، اوجلاری یایه دؤنوبدور؟

آی قاباغین شؤله وئریر گون کیمی،

یاناقلارین بدرآیا دؤنوبدور؟  

 

 کمر کیمی سارماشایدیم بئلینه،

 حناکیمی اوز سورتئیدیم الینه،

مگر نابات تؤکولوبدور دیلینه؟

 دوداقلارین تر حالوایا دؤنوبدور.   

 

 ساللاناندا ساناسان کی، خان گلیر،

 آیینه انداملی عالیشان گلیر،

 دانیشاندا مورده جیسمه جان گلیر،

 مگر نیطقین مسیحایا دؤنوبدور؟  

 

 گؤیده آیی هر دم نؤقصانا سالدین،

 سرگردانلیق چرخی دؤورانا سالدین،

 یوسیف کیمی منی زیندانه سالدین،

 مه جامالین زولیخایا دؤنوبدور.  

 

سنسن آخیر شوخ او شنگی سالیکین،

 سنسیز قیریلیبدیر هنگی سالیکین،

 او گؤردویون گولگز رنگی سالیکین،

 سارالیبان کهربایه دؤنوبدور.

              گئدیبدیر

  من طوبوییم، دؤوران منه ظولم ائتمیش،  

  عیشوم اسکیلیبدیر، نازیم گئدیبدیر.  

  دخی مندن کیمسه شادلیق اومماسین،  

  گؤردویون صؤحبتیم، سازیم گئدیبدیر.

 

  الیمده دایره دؤوران ائیلردیم،  

  چوخلارین اؤزومه حئیران ائیلردیم،  

  هر دم گشته چیخیب سئیران ائیلردیم،  

  قیشیم قاییدیبدیر، یازیم گئدیبدیر. 

 

  گوندن-گونه آرتار نه آه و زاریم،  

  گولمز اوزوم، هئچ آچیلماز گوزاریم،  

  نئجه اسکیلمه سین مئیلی- شیکاریم،  

  الیمدن توپغوم، بازیم گئدیبدیر.

 

  باش گؤتوروب بوردان قاچا بیلمنم،  

  ائتدیگیم ایقراردان کئچه بیلمنم،  

  درد بودور کی، دردیم آچا بیلمنم،  

  یار ایله بیر گیزلی رازیم گئدیبدیر.

 

  سالیکی دونیادان کم ائتمه، تاری،  

  سؤیلنسین مجلیسده شیرین گفتاری،  

  بیر زامان تاپیلماز نظم و اشعاری،  

  دئیرلر، دونیادان کاظیم گئدیبدیر.

 

بیر ردالصدر علی العجز ومستزاد قوشما:


  

  گل، ائی صدف اوغلو سولئیمان کوخا،  

  مئیخانه قاپیسین ائدک گوشاده، 

  ایچک زیاده. 

  سرمست اولوب سرخوش گزک صوبح و شام،  

  دورسون یانیمیزدا ساقییی- ساده، 

  الینده باده.

 

  الینده باده کیم، دورسون همیشه،  

  تؤوبه ندیر بیزده؟ سنگ ایله شیشه،  

  گل، چوخ دا دوشمه یَک فیکرو تشویشه،  

  دردو غمی گتیرمه یک هئچ یاده 

  بو پوچ دونیاده.

 

  بو پوچ دونیانین کی، چوخدو مؤحنتی،  

  اونوتمایاق هرگیز سازو صؤحبتی،  

  سنین اؤلموشونه، بونون لذتی--  

  اگر یوز ایل گئتسن اولماز اوقباده،  

  ائی صدفزاده!

 

  ائی صدفزاده، سنسن جواهیر،  

  قدیر- قییمتیندیر عالمده ظاهیر،  

  ایکیمیز ده اولاق بو ایشده ماهیر،  

  سؤیلنسین آدیمیز ائلده، اوباده،  

  یئتک موراده. 

 

  یئتک مورادا بیز، تاپاق توبونو،  

  تاپماریق جنّتده اوندان خوبونو،  

  بو دونیانین ها بئله محبوبونو،  

  او دونیادا بیز تاپمایاق مبادا،  

  قالاق جفادا.

 

  قالاق جفادا و اولاق پئشیمان،  

  قاچاق دوشه بیزدن حوریی و قیلمان  

  نه بیز کافیر اولاق، نه ده موسلمان،  

  ملول- موشکول قالاق، میسکین فناده،  

  کیم یئته داده.

 

  کیم یئته داده، پس حاقدن سوایی،  

  یا رب، اؤزون ساخلا من بینوایی،  

  سالیکم، سؤیلرم هرزه-هرجایی،  

  کیمسه بیلمز ندیر منده ایراده،  

  ائده ایفاده 

(1)            – ردالصدر علی العجز اودور کی بیر بئیت یا بندین سون اصطلاح ویا کلمه سی او بیری بئیت ویا بندین اوولینده تکرار اولا بو قوشمادا اولان کیمی


نوشته شده توسط سخاوت عزتی در سه شنبه 19 تیر 1386 و ساعت 09:07 ق.ظ
نوشته های پیشین
+ şəki iylə görüş+ سخاوت عزتی+ elşən əzim+ elşən əzim qifil şeri ائلشن عظیمین قیفیل شعری+ kəlbəcər balasi elməddin nicat+ کلبجربالاسی علم الدین نیجات kəlbəcər balasi elməddin nicat+ bir eşqin sonu+ səxavət ezzəti+ dil nədir+ elşən əzimin şeirləri ائلشن عظیمین شعرلری toplayan səxavət izzəti+ səxavat izzəti سخاوت عزتی+ səxavət izzəti qoşma سخاوت عزتی قوشما+ son görüş yazani səxavət ezzəti سون گؤروش یازانی سخاوت عزتی+ səməd vurğun صمد وورغون Azərbaycan+ səxavət izzəti şerlər سخاوت عزتی شعرلر

صفحات: